sans-titre-1

شنوة حملة أنا معاها ؟

أنا معاها هي حملة تهدف لتشريك أكثر من 60.000 مواطن من تونس الكبرى في الشأن العام المحلي، تبدا من 14 نوفمبر وتوفى نهار 30 نوفمبر 2016.

شكون اللي أنا معاها؟ 

أنا مع حومتي… إللي نحلم باش نصلـّحها

أنا مع التشاركية… إللي ينصّ عليها الدستور

أنا مع اللامركزية والحوكمة المحلية… إللي يضمنو لمنطقتي الاستقلالية في القرار

أنا مع البلدية… إللي تشرّكني في اتخاذ القرار

أنا مع الانتخابات البلدية… إللي تضمنلي التمثيلية والتشاركية

أنا مع تونس… إللي تعز عليا

تي ملخّر اليوم المشاركة نحبوها تولي ثقافة عند التونسي

شنوة هي المشاركة؟

هي مشاركة المواطن في مراحل تسيير الشأن العام بما فيه التخطيط والمتابعة… ملّخر إنت اليوم شريك فعلي في إتخاذ القرار.

و المشاركة فيها 4 مستويات:

  • الإعلام

  • الاستشارة

  • التشاور

  • القرار المشترك

كيفاش تشارك؟

لازمك تحضر باش تقترح وتناقش وتتخذ القرار في:

  • جلسات إعداد البرنامج السنوي للاستثمار حسب المنهجية التشاركية

  • الجلسات التمهيدية

  • الجلسات العامة المفتوحة للمواطنين

  • جلسات ومنتديات الميزانية التشاركية

  • الانتخابات البلدية

  • الاستفتاء المحلي والاستبيانات التي تنظمها البلدية

اليوم بعض البلديات في تنزيلها آليات التشاركية تعتمد تشريك المواطن في التشخيص

علاش لازمك تشارك؟

  • باش تحسن حومتك

  • باش تختار المشاريع المناسبة لحومتك

  • باش تكون شريك البلدية في القرار

  • باش تطور الخدمات البلدية وتقول كلمتك في مجال التخطيط والتهيئة العمرانية والنقل والمرافق الاجتماعية والترفيهية والثقافية والشبابية…

ملخر ما تخلي حدّ يقرّر في بلاصتك

شنوة هي البلدية؟

البلدية تحسن ظروف عيش المتساكنين وتتلهى بجمالية المدينة متاعهم وتنظفلهم الحومة وتحسّن البنية التحتية (الطرقات، الإنارة، إشارات المرور، إلخ.) وتوفر الأسواق وتبني رياض الأطفال ودور الشباب والمناطق الخضراء والمنتزهات والمسارح البلدية وقاعات الرياضة، إضافة إلى الخدمات الإدارية (مضامين، تعريف بالإمضاء، إلخ).

ملخر البلدية تقدملك برشا خدمات، ليك ولحومتك